Matthew 23
Ngasaxila'inge Noxi'a ta Tatila sou Lalotu
(Mak 12:38-40; Luk 11:37-52, 20:45-47)
1Xe ili'i la Iesu muvikalane'i ta mitema ilo'a ta molomolo noxou la aloxo 'o, 2“Ta Palisaio ilo'a ta mitema sou lapuloto ilavusou ilosiengi no anu lapuloto loxo Mosesi mu'oxonu. 3 aLa sou, anu laixe lexe ngingi ngalomu sou mo ngamulinu aloxo ane'i milosiengixu ne. Ia ngamulinu 'ili'ilixo noxi'a mamu, xo ane'i ilosiengi ne ia ilavusou imulinu uasi. 4Anu aloxo ane'i isakiinu tavuevule tu'umaxu la imuxaxu no laxasinge, ia ane'i imuxaxu avo'a sevile no anu uasi. 5 bMimii tavu'alo ane'i i'oxonu ne sou lexe ta mitema imaisi'asi. Ane'i ikaukavunu vaikala noxou Lataua la isakii no alaie'i xe itaanu tokolomo veveeni la lamota sou veveeni uvuvu ulili ulu'e no anu la ixixaoxao. 6Mo ane'i ilavu sou imasaxa lexe ixolu uuli no anu puloulou laixesi no anu voxo sou la'ilali toxotoxoxa'a. Mo imasaxa lexe ixolu no anu puloulou uulisi no anu taasou lalotu noxi'a ta Iutaia. 7Mo ane'i imasaxa sou ta mitema ixalisi'a no anu taasou pitapita la i'oxonu aso laixe noxi'a xe imoxo'a lexe, ‘Tisa.’ 8Ia ngingi ta mitema imoxo'inge lexe tisa uasi, xo itema vilesisi anu ‘tisa’ noxinge ia ngingi tavu'alo ne ngamoxo'inge lexe ta vivixesi. 9Mo namoxo'u itema vile no lia 'o lexe maminge uasi xo nenge Maminge vilesisi Anu 'a uxoxolu teitexi no opo loxotolo. 10Mo ngamoxo'u vile lexe tisa, uasi, xo tisa noxinge vilesisi ane Kalisito. 11 cMo tilasinge ne anu uxali loxo itema sou xaixai noxinge. 12 dXo 'ei ane u'itinu ualasou la Lataua utaloxolixu xe 'ei ane utaloxolixu la Lataua u'itinu ualasou.13Mo eni avikalangengi ta mitema sou lapuloto mo ta Palisaio lexe, ngasaxilaixe laixe no anu tu'utu'umaxu ane sou uxalinoxinge, xo ngingi ta mitemasou kalakalavoi. Xo ngingi ngetatusou aitenga sou saxisaxila'u noxou Lataua teitexi no opo loxotolo no ie'i ta mitema. Ia ngingi ngalavu sou nga'unalai uasi, io no mine ta mitema itovo lexe i'unalai la ngingi nga'apixa'a. 15Eni talelingenge ta mitema sou lapuloto mo ta Palisaio no anu tu'utu'umaxu ane sou uxali noxinge xo ngingi ngaxixaoxao no xalexaleenu lia mo no luaki xalexaleenu sou nga'oxonu itema vilesisi sou uxali molomolo noxinge. Mo no mine ngingi nga'oxonu uxali loxo molomolo vile noxinge ukalu, la nga'oxonu ua'ulingenge no anu 'ili'ilixo masumasua manina, la sou uxali molomolo sou navu e u'ani'ani no taxa la kaluxu uasi 'ole.
16 eMo eni talelingenge no anu tu'utu'umaxu ane sou uxali noxinge. Xo ngingi iengi seleveenu ia nga'oxo lexe ngalosie'ixa'a ta mitema vote'i. Ngingi ngavikala aloxo 'o, ‘Lexe itema vile uvikala lexe manina teitexi no taasou lalotu la anu mii vile uasi. Ia lexe itema vile uvikala lexe manina teitexi no anu xoulu uai no taasou lalotu la anu u'oxonu aloxo anu mulemolu ne.’ 17Ngingi iengi seleveenu mo ngexovulaulau manina. Mii ma'ia mutila manina no iou Lataua, male xoulu uasi taasou lalotu. Ngingi ngelavusou lexe xoulu uai no nano no taasou lalotu, la sou anu uxali loxo mii noxou Lataua. 18Mo ngingi ngavikala kalumo aloxo 'o. ‘Lexe itema vile uvikala manina teitexi no anu tani alelaxu sou lalotu, la anu mii vile uasi. Ia anu uvikala lexe manina teitexi no anu mimii i'elaxu 'a uaai 'o, no nano no anu valovalo sou i'elaxu mimii no anu la anu u'oxonu aloxo anu mulemolu ne.’ 19Ngingi iengi seleveenu mo ngexovulaulau manina. Mii ma'ia anu mutila no iou Lataua mii sou i'elaxu, uasi valovalo sou i'elaxu mimii no anu? Ngingi ngano'u mimii ngane'e nga'elaxu no tani alelaxu ne la sou ngingi nga'oxo lexe anu mii noxou Lataua. Ia uasi valovalo anu mii tatila no anu mii e nga'elaxu ne. 20Aloxo ne la sou 'ei ane uvikala lexe manina teitexi no anu tani alelaxu sou lalotu ne la muvikala aloxo ne no anu tani alelaxu sou lalotu mo no mimii tavu'alo e muai no nano no anu. 21Mo 'ei ane uvikala lexe manina teitexi no anu taasou lalotu, la anu u'oxonu aloxo ne no anu taasou lalotusi uasi, anu mu'oxonu aloxo ne noxou Lataua. 22 fMo 'ei ane uvikala lexe manina teitexi no opo loxotolo, la anu uvikala aloxo ne ulai teitexi no opo loxotolosi uasi, anu mu'oxonu aloxo ne no anu puloulou noxou Lataua mo noxou anu ane uxolu no anu puloulou ne.
23 gEni talelingenge ta tisa sou lapuloto mo ta Palisaio no anu tu'utu'umaxu ane sou uxali noxinge xo ngingi ta mitema sou kalakalavoi. Ngingi ngalavusou ngano'u mimii tuma'u lailaixe ngatounu no xai loxo, mint mo dilu xe kumini la ngakalipalanu sou ngalosou Lataua na'u mavulovexasou. Mimii kitukitu no anu Lapuloto noxou Mosesi ngingi ngemulinu laixe. Ia ngingi ngalavusou ngamulinu mii ta tatila lapuloto mulemolu uasi, loxo 'ili'ilixo ane mulapu mo 'ili'ilixo sou alauna xe 'ilixo sou ngamuxamuxaxu tangengi no anu vaikala noxou Lataua. Anu laixe lexe ngingi xavingengi sou ngamulinu vaivaikala sou lapuloto ane ta tatila muai tei aloxo xavingengi sou ngamulinu ane sou vaimomo 'o. 24Ngingi e iengi seleveenu ia nga'oxo lexe ngalosie'i ta mitema vote'i. Ngingi aloxo itema e mumaisou vuvuu muxolu no anu la'ilalixu la muxexeenu, io umaisou kameli uxolu no anu la'ilalixu uasi la mumalukusou.
25 hEni talelingenge ta mitema sou lapuloto mo ta Palisaio no anu tu'umaxu ane sou uxali noxinge xo ngingi ta mitema sou kalakalavoi. Ngingi ngalavu sou nga'uinu paku mo lakupapa, la nga'uinu no ale no vasimolusi malemalenga. Ia no nano ne nuni'u mo ngetaanu la'ilali ne ngeno'u no anu 'ili'ilixo sou pakali xo ngingi ngexavutalangengisi. 26Ngingi ta Palisaio ne iengi seleveenu. Lexe ngingi ngamasaxa lexe nga'uinu paku xe lakupapa la nga'uinu tanu no nano mo malemalenga tei xe ukalu la sou ngingi nga'uinu vasimolu no ale. 27 iEni talelingenge ta mitema sou lapuloto mo ta Palisaio no anu tu'umaxu ane sou uxali noxinge, xo ngingi ta mitema sou kalakalavoi. Ngingi aloxo lulu e mimulaxu lasimeni sou xe mukalu la milulunu kuvo sou no ale no vasimolu la mukea loxo 'o, mo laixe sou tamaisousi. Ia no nano no tanu ne mu'ana'ana no anu ta mitema misoisoli xinexine'i xe mimii nuninuni'u. 28 jLa sou anu iou vilesisi aloxo ngingi ngamulinu 'ili'ilixo mulapu sou ta mitema imaisou no ale no vasimengesi. Ia no nano no tangengi ne, mu'ana'ana no anu 'ili'ilixo masumasua xe no anu 'ilixo sou kalavoi.
Iesu Muvikala Lamana no Anu Mimii Masumasua Lakolisou
29Mo eni talelingenge ta tisa sou lapuloto mo ta Palisaio no anu tu'umaxu anu sou uxali noxinge xo ngingi ta mitema sou kalakalavoi. Xo ngingi nga'asou lulusi'a ta mitema sou palomatana xe ngatokolomonu lulusi'a ane'i ane mi'oxonu 'ilixo mulapu ne laixe. 30Mo ngingi ngavikala aloxo 'o, male lexe ngingi ngaxolu tatei la umomomo sou ngasu'uline'i ta 'ilusulusungengi, sou ngave'ave'a ta mitema sou palomatana isoisoli uasi. 31 kLa sou ngingi mulaa no anangenge lexe ngingi ta 'ilusulusungengi ane mive'ave'a ta mitema sou palomatana misoisoli tatei ne. 32Ioxe, aloxo ne la ngingi ngalai nga'oxo mo ngasolonu 'ili'ilixo masua noxi'a ta 'ilusulusungengi ne. 33 lNgingi loxo lasile molosila mo lasile molosila ta 'olu. Ngingi ngamomomo sou ngapolopepeenu taxa sou navu a loxovaa? 34Aloxo ne la sou eni apalusi'a ta mitema sou palomatana xe ta mitema sou lavulavu ilo'a ta tisa sou lapuloto ine'e noxinge. Ia ngingi ngalutu vaxa la ngave'ave'a se'i isoisoli xe ngailixa'a no ovu valautu. Xe se'i la ngingi ngapuapuasi'a no nano no taasou lalotu noxinge, xe se'i la ngingi ngakusai'a no tuala ta tatila noxinge la i'ume ilai no tuala ta tatila se'i va'axu. 35 mAloxo ne la sou tu'umaxu sou sialuxa'a ta mitema mulapu e munixi no lia 'o ne utelo noxinge. Usoko noxou Aveli sialuxu ulai uxali noxou Sekalia e Velekia 'olu, e ngingi ngevau la musoli muai no taiinu valovalo sou i'elaxu mimii, no nano no anu taasou lalotu tatila noxou Lataua. 36Eni avikalangengi manina lexe ulu sou sialuxa'a ta mitema mulapu ne, ngingi ta mitema e ngepaa vaimomo 'o ngatavulenu.Iesu Tanuxu Tuala Tila ne Ielusalemu
(Luk 13:34-35)
37Iauo, ta mitema ne Ielusalemu 'o, ngingi ngeve'ave'a ta mitema sou palomatana misoisoli mo ta mitema e Lataua mupalusi'a mine'e la ngeve'ave'a no anu kulu la misoisoli. Ia alaxu tavu'alo misevile eni atovonu sou lexe apitangengi loxo koko'a neni'a ipitane'i ta 'ilie no vivisie laaxu la ngingi ngamasaxa uasi. 38 nNgalomu, ili'i la Lataua iou uvaxainge la taasinge mo tualasinge ne uxolu vitanisi. 39 oEni avikalangengi aloxo 'o, usoko vaimomo 'o la umomomo sou ngamaisilo la uasi. Ia ulai ili'i la ngingi ngavikala lexe, Lataua ualusou anu ane Tila mupalusou mune'e 'o.”
Copyright information for
ATA